लन्डन ।
रुसले युक्रेनमाथिको आक्रमण जारी राखेकै बेला राष्ट्रसंघले तत्काल युक्रेनबाट सेना हटाउन रुसलाई आह्वान गरेको छ ।
राष्ट्रसंघीय महासभाले हिजो एक प्रस्ताव पारित गर्दै यस्तो आह्वान गरेको हो । १८१ देश सहभागी महासभाले युक्रेनबाट तत्काल रुसी सेना हट्नुपर्ने सम्बन्धि प्रस्तावलाई अत्यधिक बहुमतले पारित गरेको हो । प्रस्तावमाथि मतदान हुँदा १४१ वटा देशले प्रस्तावको पक्षमा मतदान गरेका थिए भने ५ वटा देशले विरोधमा मतदान गरेका थिए ।
३६ देश भने मतदानमा सहभागी नै भएनन् । राष्ट्रसंघीय महासभाको प्रस्ताव पारित भएपछि युक्रेनी राष्ट्रपति भोलोडिमिर जेलेन्स्कीले विश्व समुदायलाई ऐक्यवद्धताका लागि धन्यवाद दिंदै आखिरमा जीत युक्रेनकै हुने प्रतिक्रिया दिुनभएको छ ।
राष्ट्रसंघले रुसको आक्रमणबाट युक्रेनमा अहिलेसम्म २२७ जना सर्वसाधारण मारिएको र ५२५ जना घाइते भएको जनाएको छ।यस्तै ८ लाख ७० हजार युक्रेनीहरु देश छाडेर भागेको पनि राष्ट्रसंघको भनाइ छ । यता, आक्रमणको सातौं दिन पनि रुसी सेनाले युक्रेनका विभिन्न शहरमा हमला जारी राखेको छ ।
दक्षिणी शहर खर्सोन रुसी सेनाको कब्जामा गएको त्यहाँका मेयरले नै स्वीकार गरेका छन् । राजधानी किभमा भने रुसी सेना अहिलेसम्म प्रवेश गरिसकेको छैन ।
किभको उत्तरी काँठमा भेला भएर रुसी सेना बसेको जनाइएको छ ।
