माता दक्षिणकालीले सबैको कल्याण गरुन,आषाढ २९ गते आइतबार\ जुलाई १४ तारिखको राशिफल

वि.सं. २०७६ आषाढ २९ गते आइतबार तदनुसार ई. सं. २०१९ जुलाई १४ तारिख, परिधावी नामक संवत्सर, सूर्य उत्तरायण, गृष्म ऋतु, आजको चाडपर्व र उत्सव : भानु जयन्ती, नेपाली भाषा एकीकरण दिवस, रविप्रदोष व्रत, आजको मूहुर्त : रुद्राभिषेक(रुद्रीपूजा), अग्निवास(होमादि), कलशचक्र, आषाढ शुक्लपक्ष (दिल्लाथ्व) त्रयोदशी तिथि, मध्यरात्रीपछि ०१:१२ बजेसम्म, त्यसपछि चतुर्दशी तिथि, ज्येष्ठा नक्षत्र, साँझ ०६:४५ बजेसम्म, त्यसपछि मूल नक्षत्र, चन्द्रमा बृश्चिक राशिमा, साँझ ०६:४५ बजेसम्म, त्यसपछि धनु राशिमा, शुक्ल योग, बिहान ०६:२१ बजेसम्म, त्यसपछि ब्रह्म योग, सुरुमा कौलव करण दिउँसो ०१:२१ बजेसम्म, त्यसपछि तैतिल करण मध्यरात्रीपछि ०१:१२ बजेसम्म, अन्तिममा गर करण, आनन्दादि योग : काण, चन्द्रवर्ण : रातो, चन्द्रदिशा : उत्तर, योगिनीदिशा : दक्षिण, वारशूल : पश्चिम, नक्षत्रशूल : पूर्व, काठमाण्डौ, नेपालमा, सूर्योदय : बिहान ०५:१८ बजे, सूर्यास्त : साँझ ०७:०० बजे, दिनमान : ३४ घडी १४ पला (१३ घण्टा ४२ मिनेट, रात्रीमान : २५ घडी ४६ पला (१० घण्टा १८ मिनेट)

आजका लागि अशुभ समय :–
राहु काल : बेलुका ०५:१७ देखि ०७:०० सम्म, यमघण्ट : दिउँसो १२:०९ देखि ०१:५२ सम्म, गुलिक काल : दिउँसो ०३:३५ देखि ०५:१७ सम्म

आजका लागि शुभकर्म प्रारम्भ गर्न उपयुक्त समय :–
शुभ वारवेला : दिउँसो ०१:५२ देखि ०३:३५ सम्म, अमृत वारवेला : बिहान १०:२६ देखि १२:०९ सम्म, लाभ वारवेला : बिहान ०८:४४ देखि १०:२६ सम्म, आज पुरुषको नेतृत्वमा पश्चिम र उत्तर दिशाको तथा महिलाको नेतृत्वमा उत्तर र पूर्व दिशाको यात्रा शुभ हुन्छ । तर बाध्यतावश अन्य दिशामा समेत यात्रा गर्नुपर्ने भएमा पान वा घिउ खाएर यात्रा सुरु गरेमा शुभफल प्राप्त हुने विश्वास गरिन्छ ।

मेष (चु, चे, चो, ला, लि, लु, ले, लो, अ) –
आज बेलुकी भाग्यस्थानमा चन्द्रमाको प्रवेश हुँदैछ, तर दिनभरि अष्टम भावमा चन्द्रमा हुनेहुँदा परिस्थिति विपक्षमा नै रहने सङ्केत देखिन्छ । कडा परिश्रम व्यर्थै खेर जान सक्छ । हाकिम, मातापिता वा विशिष्ट व्यक्तिसँग चित्त नबुझ्न सक्छ । बोलीमा संयमता अपनाउनु पर्छ किनकि भनेको कुराले विपरीत अर्थ वहन गर्नेछ । नयाँ साथीभाइलाई झट्ट विश्वासमा लिनु हुँदैन । सामाजिक र परोपकारका मार्गमा अवरोध हुनेछ । कताकता भाग्यबलमा कमी भएको आभास गर्नु हुनेछ । बन्दव्यापार र रोजगारीको क्षेत्रमा लगनशील र सक्रिय भएमा मात्र सफलता पाउनु हुनेछ । दाम्पत्य जीवन पनि निराशापूर्ण नै रहने छ । साँझपखदेखि निराशाको अन्त्य हुनसक्छ ।

बृष (इ, उ, ए, ओ, बा, बि, बु, बे, बो) –
मन रोमान्टिक र भावुक बन्नेछ । रमझम र मनोरञ्जनमा आकर्षण बढ्रन सक्छ । घुमघाम, भेटघाट र मनोरञ्जनमा दिन बित्नेछ । प्रेमको बन्धनमा बाँधिने बेला छ । दाम्पत्यसम्बन्ध सुखद रहनेछ । स्वास्थ्यस्थितिमा अनुकूलता आउनेछ । काम गर्न जाँगर चल्नेछ, उत्साहवर्द्धक समय छ, आम्दानी बढ्न सक्छ । व्यवसायी र कर्मचारीका लागि आज कार्यक्षेत्र र व्यवसायको उचाइमा पुग्ने समय हो । तर दिन ढल्दै जाँदा पारिवारिक जिम्मेबारी बढ्दै जानेछ, अनि व्यवसायिक गतिविधि छाडी रामरमाइलोमा आकर्षण रहने देखिन्छ । सबैका लागि आम्दानीका दृष्टिले गज्जबको समय छ, धनसञ्चित हुनसक्दैन, भोगविलास र मनोरञ्जनका क्षेत्रमा खर्च बढ्न सक्छ ।

मिथुन (का, कि, कु, घ, ङ, छ, के, को, ह) –
लामो समयदेखि रोकिएका कामहरू बन्न सक्ने मौका छ । आकस्मिक निम्तोमा सहभागी हुने सम्भावना छ । मिष्ठान्न भोजनको अवसर आउने छ, तर छैटौं भावको चन्द्रमाले स्वास्थ्यबाधा गराउन सक्छ, आहारविहारमा विशेष सतर्क रहनु राम्रो हुन्छ । शारीरिक प्रतिस्पर्धा र तर्क, विवाद वा न्याय सम्पादनका सिलसिलामा लाभ प्राप्त गर्न सक्नुहुनेछ । मानसम्मान र प्रतिष्ठाको प्राप्ति हुनसक्छ । आजको विनियोजन र लगानीले उत्तरोत्तर फाइदा हुनेछ । घरायसी सुखसुविधा बढाउने कुनै महँगो वस्तुको किनमेल गर्न मन लालायित हुनेछ । यात्रा लाभप्रद बन्न सक्छ, तर धेरै टाढा जानु पर्दैन । आर्थिक समस्या निराकरण गर्ने उपाय पत्ता लाग्नेछ । गृहिणीहरूले बाझोजुझोबाट टाढा रहनु होला ।

कर्कट (हि, हु, हे, हो, डा, डि, डु, डे, डो) –
आत्मबल बढ्ने समय छ । मानप्रतिष्ठा र सामाजिक मर्यादामा अभिवृद्धि हुनेछ बन्दव्यापारबाट लाभ मिल्नेछ । इष्टमित्रले प्रशंसा गर्नेछन् । बन्धुबान्धव र दाजुभाइका तर्फबाट खुशीको खबर प्राप्त हुने छ । माया/प्रेमको वातावरण बन्नेछ । पारिवारिक सहयोग बढ्ने छ । ठूलाबडाले सहयोग गर्नेछन् । खासगरी यस राशिका छात्रछात्राका लागि शैक्षिक प्रगतिका लागि अनुकूल समय आएको छ, पठनपाठनमा ध्यान दिनु बेस हुनेछ । ज्ञान र चिन्तन उपयोगी बन्नसक्छ । गुरुजन, अभिभावक र साथीभाइले उपयोगी र आवश्यक सहयोग प्रदान गर्नेछन् । गृहस्थीहरूले छोराछोरीका माध्यमबाट सन्तोष प्राप्त गर्नेछन् । जसले पनि परीक्षा, प्रतिस्पर्द्धा र प्रतियोगितामा सफल हुने दिन छ ।

सिंह (मा, मि, मु, मे, मो, टा, टि, टु, टे) –
दिनभरि चतुर्थ भावमा चन्द्रमा रहने भएकाले घरपरिवारभित्रका विविध समस्यामा रुमल्लिनु पर्ने छ, घरबाहिर हुनुहुन्छ भने नमज्जा लाग्नसक्छ वा मनले नमानेको क्रियाकलापमा सहभागी बन्नुपर्छ । दिनभरि शरीरमा स्फूर्ति र उमङ्गको कमी हुनेछ । प्रेमसम्बन्धमा विश्वासको कमी देखिने छ । छर–छिमेकमा असमझदारी बढ्ने सम्भावना छ । तर देशविदेशको यात्रामा रहेका र वैदेशिक प्रयोजनका काम गर्नेहरूले दौडधूप गर्नु परे पनि लाभ लिन सकिने समय छ । जुन काम गरे पनि आमा वा घरकी ज्येष्ठ महिलाको सल्लाहमा गर्नु मुनासिब हुनेछ । आज बेलुकादेखि दार्शनिक वा बौद्धिक क्षेत्रमा दिलचस्पी बढ्ने छ । आज प्रतिस्पर्धा र प्रतियोगिता भिड्नेले अलि मिहिनेत गर्नुपर्ने समय छ ।

कन्या (टो, प, पि, पु, ष, ण, ठ, पे, पो) –
पराक्रम र प्रसिद्धि बढाउने समय भएकाले आज कसैले पनि अल्छी र आलस्य मानेर समय खेर फाल्नु हुँदैन । बन्धुबान्धव, साथीभाइ र मित्रवर्गबाट उत्कृष्ट सहयोगको आशा गर्न सकिन्छ । भाइबहिनीले पनि सन्तुष्ट तुल्याउने छन् । धार्मिक, सामाजिक र परोपकारी काममा सहभागी बन्नु पर्नेछ । दीर्घकालिक फाइदाका लागि गरिएको प्रयासमा सफलता मिल्नेछ । बन्दव्यापारमा सोचेको फाइदा हुने दिन छ । आम्दानीमा बढोत्तरी हुनेछ । झैझगडा र विवादमा विजयी बन्नु हुनेछ तर बोलीवचनमा कडापन त्यागेको राम्रो हुन्छ । प्रायः सबैको पारिवारिक जीवन सन्तोषप्रद रहने छ । छात्रछात्राले प्रतियोगिता र प्रतिस्पर्द्धाका माध्यमबाट प्रतिष्ठा बढाउने समय हो ।

तुला (र, रि, रु, रे, रो, ता, ति, तु, ते) –
मिष्ठान्न भोजन मिल्नेछ । बोलीको प्रभाव बढ्नेछ, आफन्तले प्रशंसा गर्नेछन्, जाँगर बढ्नेछ । चेलीबेटी र कुटुम्बपक्षका काममा समय दिनु पर्नेछ । बन्दव्यापार राम्रो छ । आर्थिक लगानी बढाउन अनुकूल छ । नयाँ ठाउँमा निवेश र लगानीको वातावरण बन्नेछ, कारोबारमा सुधार आउने योग छ । प्रशंसकहरू बढ्नेछन् । सहयोगीहरूले काममा साथ दिनेछन् । राम्रै फाइदाको योग छ । विगतको श्रमबाट प्रशस्त धन लाभ हुनेछ । रोकिएका काम सम्पादन हुनेछन् । विद्यार्थीहरूका लागि पठन–पाठनमा प्रगति हुनेछ । प्रतियोगितात्मक क्रियाकलापमा सफल हुनुहुने छ । सामाजिक कार्यकर्ता र राजनेताले समाजमा गएर आफ्ना कुरा राख्ने मौका पाउने छन् ।

बृश्चिक (तो, ना, नि, नु, ने, नो, या, यि, यु) –
नयाँ कामको लागि नयाँ अवसर आउनेछ । निर्माण तथा व्यवहारिक क्षेत्रमा मन आकर्षित हुनेछ । मन त्यसैत्यसै फुरुङ्ग हुने समय छ । दैनिक कामकाज सजिलै सम्पन्न हुनेछन् । आफन्त र मित्रहरूसँग भेटघाट र रमाइलो गरिने छ । घरपरिवारमा राम्रो छ । बन्दव्यापार र रोजगारीका क्षेत्रमा लाभ मिल्नेछ । प्रतिष्ठित काम गर्ने मौका छ । आत्मविश्वास बढ्नेछ । विशिष्ट व्यक्तित्वसँग भेटघाट हुनेछ । पारिवारिक जमघटमा मन रमाउनेछ । मन पर्ने वस्त्र, अलङ्कार आदि उपहार पाइने योग छ । स्वादिष्ट भोजनको आनन्द समेत पाइएला । बन्दव्यापारबाट लाभ मिल्नेछ । फुर्सद नमिले पनि राम्रो नतिजा हात पर्नेछ । छात्रछात्रा, परीक्षार्थी र प्रतियोगीले नयाँ ज्ञान पाउने समय हो ।

धनु (ये, यो, भ, भि, भु, ध, फा, ढ, भे) –
यात्राको योग छ । चन्द्रमा अनुकूल छैन, तर अन्य ग्रहको शुभ बल छ, यद्यपि यात्राका क्रममा होस राख्नु र खानपानमा नियन्त्रण गर्नु बेस हुनेछ । आज हरेक काममा अवरोध आउने समय हो, बेलाबेलामा अशान्ति र छटपटी हुनसक्छ तर बाधा देखिए पनि अत्तालिइ हाल्नु पर्दैन । कुनै गोप्य योजना कार्यान्वयन गर्न आजको दिन अनुकूल छ । बन्दव्यापारमा बेफाइदा छैन । आत्मबल र हौसला नत्यागे सफलता पाउनु हुनेछ । वहस र वादविवादमा विजय प्राप्त हुनेछ । परोपकारका क्षेत्रमा आकर्षण बढ्ने छ । नयाँ कामको वातावरण तैयार हुनेछ । पारिवारिक जीवन सन्तोषप्रद रहने छ, घरखर्चमा बृद्धि हुनेछ । भरे साँझ तपाईंको राशिमा चन्द्रमा आइपुग्ने छ, त्यसपछि आशावादी बन्दा राम्रो हुन्छ ।

मकर (भो, ज, जि, खि, खु, खे, खो, गा, गि) –
पराक्रम र प्रसिद्धिमा वृद्धि हुने समय छ । मिहिनेत गर्नुपर्छ, जे गरे पनि सफलता आर्जन हुने दिन छ । देवालय मठ मन्दिर आदिको भ्रमण र दर्शन हुनेछ वा धार्मिक तथा आध्यात्मिक क्षेत्रतर्फको काममा सहभागी बन्नु पर्ला । नोकरी गर्नेले मानसम्मान पाउने छन् । प्रशासनिक र राज्यपक्षबाट हुनुपर्ने काममा सफलता प्राप्त हुनेछ । इष्टमित्रले प्रदान गरेको सल्लाहलाई पालना गर्दा फाइदा हुने योग छ । विश्वासको वातावरण बन्नेछ । घरायसी वातावरणमा सुधार आउने छ, रमाइलो पारिवारिक जमघट हुनसक्छ । पठनपाठन र प्राज्ञिक क्षेत्रबाट लाभ लिन सकिने छ, तर आन्तरिक मोजमज्जामा भुलिनाले विद्यार्थीहरू लक्ष्यप्रति भ्रमित हुने समय हो, सचेत हुनुपर्छ ।

कुम्भ (गु, गे, गो, सा, सि, सु, से, सो, द) –
स्वास्थ्यस्थिति राम्रो रहनुका साथै काम गर्ने जाँगर बढ्ने छ । पारिवारिक सुखसम्मृद्धिमा बृद्धि हुनेछ । काममा सोचेजस्तै सफलता मिल्नुका साथै उन्नति गर्ने अवसर प्राप्त हुने योग छ । नवीन रोजगारीको सम्भावना छ । प्रतिस्पर्धीहरूमाथि विजय प्राप्त हुनेछ । धैर्यधारण गरी परिश्रम गर्ने दिन हो । मातापिता र अभिभावकवर्गको सहानुभूति र आशीर्वादले काम गर्नसक्ने समय छ । विद्यार्थीले गुरुजनबाट र कर्मचारीले हाकिमबाट महत्वपूर्ण कुरा फुत्काउन सक्छन् । आज ठूलाबडाको सहयोग र सल्लाहले राम्रो फाइदा लिन सकिने समय छ । गृहस्थीहरूले सन्तानपक्षबाट खुसी हुने वातावरण पाउने छन् । व्यापार/व्यवसायमा सोचेजति लाभ पाइने छ । जसले जे गरे पनि आज आफ्नो क्षेत्रमा साख रहनेछ ।

मीन (दि, दु, थ, झ, ञ, दे, दो, च, चि) –
भाग्य भावमा राशिस्वामीका साथमा चन्द्रमाको उपस्थिति छ, त्यसैले आज परोपकारी काममा खट्नु पर्ने दिन छ । दान, पुण्यका कार्यमा आकर्षण बढ्ने छ । पर्यटकीय स्थल, तीर्थ वा मन्दिरको भ्रमण हुनसक्छ । ज्ञानगुन र बौद्धिक क्षेत्रमा गरेको प्रयास सफल हुनेछ । बन्दव्यापार फस्टाउने छ । आम्दानीमा कमी हुने छैन । सानो प्रयासले रोकिएको काम बन्नेछ । तर्कवितर्क र प्रतिस्पर्धामा विजयी भइने छ । घरपरिवारमा सुमधुर वातावरण सिर्जना हुनेछ । साथीभाइले सकेको सहयोग गर्नेछन् । प्रेम र प्रणयप्रसङ्गका लागि पनि समय अनुकूल छ । सानो प्रयासले भाग्यबल बृद्धि गर्न सकिने दिन छ, त्यसैले लामो समयदेखि गर्न नभ्याएको कुनै काम छ भने त्यसतर्फ लागीपर्नु राम्रो हुन्छ ।

(द्रष्टव्य : आज उल्लेख गरिएको राशिफल असल वा खराब जेजस्तो भए पनि तपाईंले आफ्नो कामप्रति निष्ठा जनाउनु पर्दछ, कर्तव्यपालना गर्नु पर्दछ र परोपकारी/सामाजिक भावना राख्नु पर्दछ, यसो गर्नुभएमा अनिष्ट नाश हुन्छ वा न्यूनीकरण हुनेछ र राम्रो राशिफल छ भने अझ धेरै शुभफल प्राप्त हुनेछ ।)

Loading...

तपाईको प्रतिक्रिया

सम्बन्धित समाचार