-श्रवण देव
यस्तो छ किम्बदन्ती
यो मन्दिरमा बुद्ध जयन्तीकै दिन बली चढाउने चलन नयाँ होइन् । यहाँ १२५ वर्ष अघिदेखि नै बली चढाइँदै आएको जानकारहरु बताउँछन् । यहाँ गरिने हरेक भाकल पूरा हुने विश्वास गरिन्छ । भाकल पूरा भएको भन्दै श्रद्धालुहरु पशुको बली दिएर पूजा गर्छन् ।
मन्दिरमा अहिले पाँचौ पुस्ताका पूजारी छन् । पूजारी डम्बरबहादुर भट्ट भन्छन्, ‘यो मन्दिरप्रति श्रद्धालुहरुको विश्वास बढ्दै गएको छ ।’
राजदेवी माताले वैशाख पूर्णिमाका दिन आफ्नो मन्दिरमा बली चढाएमा सबैको फलिफाप हुने भनी सपनामा बताएपछि बली प्रथा शुरु भएको इतिहास सुनाउँछन् उनी ।
अहिले मन्दिर भएको ठाउँमा १२५ वर्ष अगाडि घनघोर जंगल र चरण क्षेत्र थियो । जंगलभन्दा केही टाढा चौधरी र भट्टहरुको परिवार बसोबास गर्दथे । उनीहरुले त्यो जंगलमा गाईबस्तुहरु चराउन लग्थे ।
तर प्रत्येक दिन एक-एक गाई हराउन थालेपछि गाउँलेहरु ठूला धामीको रुपमा रहेका दिलाराम भट्टकहाँ पुगे । ‘भट्टले त्यस स्थानमा गई तन्त्रसाधना गरेपछि राति सपनामा देवीले दर्शन दिई वैशाख पूर्णिमाकै दिनमा बली चढाएर भाकल गरी पूजा गर्ने हो भने सबै समस्या टर्ने बताएका थिए,’ पूजारी डम्बरबहादुरले भने, ‘देवीले सपनामा दिएको दर्शन र उनको भनाई अनुसार स्थानीयले बलीप्रथा सुरु गरे ।
अहिले राजदेवी मन्दिरमा सिरहासहित नेपालकै अन्य जिल्ला तथा छिमेकी देश भारतबाट समेत बली चढाउन आउनेहरु बढ्दै गएका छन् । दर्शनार्थीहरुले पशु बलीदेखि सुन, चाँदीका धातुसमेत मन्दिरमा चढाउने पूजारी बताउँछन् ।
