तौलिहवा : शुक्रबार राती दिपेन्द्रकुमार चौधरीको हत्याको विरोधमा उनका आफन्त तथा समर्थकले लवनी बजारमा प्रदर्शन गरेका छन् ।
आक्रोशित समूहले आगजनी नै गर्न थालेपछि स्थिति तनावपूर्ण बनेको छ । चौधरीको शव मेडिकल कलेज भैरहवाबाट अहिले लवनी ल्याएपछि त्यहाँको अवस्था तनावग्रस्त बनेको हो ।
चौधरीको हत्या गर्ने हत्यारालाई सार्वजनिक गर्न माग गर्दै समर्थकले नाराबाजा गरेका हुन् । प्रदर्शनको क्रममा प्रर्दशनकारी र प्रहरी बीच झडप हुँदा एक जना घाइते भएका छन् ।
जिल्लाको शुद्धोधन गाउँपालिका–४, मोतीभारीका चौधरीको गोली हानी हत्या भएसँगै अहिले उनीहरु आक्रोशित भएका छन् । स्थानीय राजाबाबु भनेर चिनिने चौधरीको टाउकोमा ६ राउण्ड गोली हानी हत्या भएको बताइएको छ ।
टाउकोमा गोली लागेपछि गम्भीर अवस्थामा उनलाई रुपन्देही स्थित भैरहवा मेडिकल हस्पिटल लैजाँदै गर्दा उनको मृत्यु भएको हो । प्रहरीका उपरिक्षक अच्युत पुडासैनीका अनुसार स्थानीय विवादमा शुक्रबार राति करिब साढे १० बजे चौधरीमाथि गोली प्रहार भएको थियो । हत्यारालाई कारवाही नहुञ्जेल चौधरीको शव आफन्तले नबुझ्ने भन्दै विरोध गर्दै आएका हुन् ।
