प्रहरीले स्वचालित नल कटुवा पेस्तोलसहित दुई जनालाई पक्राउ गरेको छ । पक्राउ पर्नेमा एक नेपाली र एक जना भारतीय नागरिक छन् । रौतहटको गौर नगरपालिका २ टिकुलिया बजार घर भई वीरगञ्ज महानगरपालिका १६ नगवा बस्ने १९ वर्षीय मिथुनकुमार श्रीवास्तव र भारत विहारका घर भई वीरगञ्ज १५ भिस्वा बस्ने २३ वर्षीय चुनचुन पटेललाई प्रहरीले पक्रेको हो । गएराति मध्यरातमा भिस्वा गाउँबाट उनीहरुलाई स्वचालित पेस्तोल सहित पक्राउ गरिएको जिल्ला प्रहरी कार्यालय पर्साले जानकारी दिएको छ ।
श्रीवास्तवले पाइन्टको दाहिने खल्तीमा पेस्तोल लुकाएको अवस्थामा फेला परेको प्रहरीको भनाइ छ । दुवै जनालाई जिल्ला प्रहरी कार्यालयको हिरासतमा राखिएको छ । उनीहरु विरुद्ध हात हतियार तथा खरखजना मुद्दा दर्ता गरिएको छ ।
