सीताराम बराल शिवनगर, चितवन,
मंगलबार बिहान मर्निङवाकमा प्रचण्ड
५ मंसीरमा चितवन आइपुगेका एमाले अध्यक्ष केपी शर्मा ओलीले माओवादी केन्द्रका अध्यक्ष पुष्पकमल दाहाल प्रचण्डले ‘चितवन ३ मा चुनाव जितिसकेको’ घोषणा गरे।
सँगसँगै उनले एमाले–माओवादी केन्द्रका स्थानीय नेता–कार्यकर्तालाई एउटा चुनौति पनि दिएर गए, ‘चितवन ३ मा प्रचण्डले ठूलो मतान्तरले जित्नु भएन भने त्यो वामगठबन्धनका लागि लाजको कुरा हुन्छ, त्यसैले यहाँ कम्तिमा पनि १५–२० हजार मतले जिताउने अवस्था सिर्जना गर्नुस्।’
पुत्रशोकका कारण पत्नी सीता अझै सम्हालिन नसकेपछि प्रचण्ड ओलीसँग वामगठबन्धनको देशव्यापी संयुक्त चुनाव प्रचारमा जान सकेका छैनन्। शुक्रबार दुई बुहारीबाहेक सम्पूर्ण परिवारसहित चितवन झरेपछि उनी आफ्नो चुनाव क्षेत्रमै केन्द्रित भएका छन्।
निर्वाचन हुन ९ दिन बाँकी रहँदा चितवन ३ मा सहज जित हासिल हुने निष्कर्ष निकालेका एमाले–माओवादी केन्द्रका नेता कार्यकर्ताहरुले ओलीले भनेझैं, कसरी मतान्तरलाई फराकिलो बनाउन सकिन्छ भन्नेमा आफूलाई केन्द्रित गर्न थालेकोजस्तो देखिन्छ।
यसक्षेत्रमा नेपाली कांग्रेसका आफ्नै उम्मेदवार छैनन्। लोकतान्त्रिक गठबन्धनको नेतृत्व गरेको कांग्रेसले यहाँ राप्रपा (प्रजातान्त्रिक) का महामन्त्री विक्रम पाण्डेलाई समर्थन गरेको छ।
कांग्रेसको आफ्नै उम्मेदवार नहुनुको फाइदा उठाउँदै एमाले–माओवादी केन्द्रको ध्यान कसरी हुन्छ, कांग्रेस समर्थकहरुको मत आकर्षित गर्नेतर्फ केन्द्रित छ। एमाले कार्यकर्ता शंकर थपलिया भन्छन्, ‘त्यसको प्रतिफल पनि देखिन थालेको छ, दिनहुँजसो कांग्रेस समर्थक मतदाताहरु वामगठबन्धनमा प्रवेश गरिरहेका छन्।’
चितवन ३ शिवनगरस्थित बरबोट भन्ने ठाउँमा रहेको वामगठबन्धनको कार्यालयमा सोमबार साँझ ५–७ जनाको एउटा समूह आइपुग्यो। त्यो समूह शिवनगर–गीतानगर क्षेत्रका कांग्रेस समर्थकहरुको रहेछ, जो पार्टीले राप्रपा प्रजातान्त्रिकलाई यसक्षेत्रमा समर्थन गरेकोमा असन्तुष्टि जनाउँदै वामगठबन्धनमा प्रवेश गर्ने योजनामा रहेछन्।
को को कांग्रेस छाडेर वामगठबन्धनलाई समर्थन गर्न चाहन्छन्, कागजको पानामा लेखिएको नाम नै पेश गर्यो यो समूहले। मंगलबार बिहानको मर्निङवाकपछि प्रचण्डले यो समूहलाई पार्टी प्रवेश गराए।
मंगलबार मर्निङवाकपछि घुमाउने चौतारोमा कांग्रेस समर्थकलाई माओवादीमा प्रवेश गराउँदै प्रचण्ड
चितवन ३ लाई केन्द्रित गर्दै प्रचण्डले शिवनगर नजिकैको लाहुरेचोकमा डेरा जमाएका छन्। बरबोटमा रहेको चुनावी कार्यालयको दृष्य केही समय हेरेपछि उनको लाहुरेचोकस्थित निवासमा पुग्दा माडी र बाँदरझुला क्षेत्रमा आइतबार र सोमबार चुनावी कार्यक्रम सकेर फर्किएका प्रचण्ड नेपाली कांग्रेसका स्थानीय नेता–कार्यकर्तासँग चुनावी अभियानका विषयमा कुराकानी गरेर बसिरहेको भेटिए।
यो समूहपनि यस क्षेत्रका कांग्रेस समर्थक अधिकांश मतदाताले समानुपातिकतर्फको मत कांग्रेसलाई र प्रत्यक्षतर्फ प्रचण्डलाई दिनेमा आश्वस्त गराइरहेको थियो।
चितवन ३ मा पर्ने भरतपुर महानगरपालिकाका १५, १७, १८, १९, २०, २७, २८ लगायतका वडामा कांग्रेसको पकड बलियो रहेको मानिन्छ। १९ नम्बर त झन् त्यही वडा हो, जहाँ स्थानीय तहको निर्वाचनमा सबैभन्दा बढि विवाद भयो। यो वडाको मतपत्र च्यातिएको विषय राष्ट्रिय चर्चामा पनि आयो। कांग्रेसको पकड रहेको यसै वडाबाट प्रचण्डलाई अत्याधिक मत आउने कुरामा एमाले–माओवादीका कार्यकर्ता अति विश्वस्त भेटिन्छन्।
यो वडाको अत्याधिक मत अब प्रचण्डलाई आउने दावी गर्छन् माओवादी कार्यकर्ता द्रोण सिवाकोटी। उनको तर्क छ, किनभने यसै वडामा बसोबास गर्ने कांग्रेसका प्रभावशाली सदस्य मोहनसिंह लामा गत हप्ता प्रचण्डलाई जिताउने आव्हानसहित वामगठबन्धनमा प्रवेश गरे।
लामा नेपालकै पहिलो मानिने बखानसिंह सहकारी संस्थाका अध्यक्ष हुन्। यो सहकारी चितवन कांग्रेसका प्रभावशाली नेता बखानसिंह गुरुङले २०१३ मा स्थापना गरेका थिए। गुरुङ तिनै व्यक्ति हुन्, जसले २००७ र २०१८ को सशस्त्र संघर्षमा दुई छोरा गुमाएका थिए।
गीतानगर क्षेत्र ओगट्ने महानगरको ६ नम्बर वडामा पनि आफूहरुको स्थिति मजबुत भइसकेको एमाले–माओवादी केन्द्रका स्थानीय नेताहरुले दावी गरे। सिवाकोटीकै भनाईमा, गीतानगर क्षेत्रमा यसअघि वामपन्थीहरुको प्रभाव निकै कमजोर थियो।
‘कुनै व्यक्ति वामपन्थी हो भन्ने थाहा भयो भने पानी माग्दापनि पाइँदैनथ्यो त्यहाँ, कांग्रेस समर्थकहरुले गोद्थे’, सिवाकोटीले नेपालखबरसँग भने, ‘कांग्रेसको त्यो गढ अब कायम रहेन, यो वडाबाट पनि हामीहरु कांग्रेसकै बराबरी मत पाउने स्थितिमा पुगिसकेका छौं।’
स्थानीय तह निर्वाचन परिणाम अनुसार कांग्रेस–राप्रपा गठबन्धन भन्दा एमाले–माओवादी केन्द्रले यस क्षेत्रमा ८ हजार बढि मत पाएका छन्। प्रचण्डको आगमनपछि वामगठबन्धनको पक्षमा झन् धेरै मत आउने अवस्था बनेको एमालेका थपलिया बताउँछन्।
‘प्रचण्डको व्यक्तित्व र एमाले–माओवादी एकजुट भएर चुनावी अभियान सञ्चालन गरेकाले स्वतन्त्र मतदाताहरु पनि उनलाई जिताउने पक्षमा खुल्न थालेका छन्’, एमाले चितवनका सल्लाहकार सदस्यसमेत रहेका थपलियाले भने, ‘हाम्रो आँकलनमा १२ देखि १५ हजार मतान्तरले अगाडि छौं, चुनावसम्म यो मतान्तर अरु बढ्छ।’
भरतपुर महानगरपालिकाको चुनावमा मतपत्र च्यातिएपछि एमाले–माओवादी केन्द्रबीच जस्तो तिक्तता सिर्जना भयो, उम्मेदवारी दर्ताका बेलासम्म त्यसको केही तुष बाँकी रहेपनि पछिल्लो समय त्यो मेटिइसकेको मतपत्र च्यातेको आरोप लागेका सिवाकोटी र थपलिया सँगै बसेर चुनावी कार्यक्रम बनाइरहेको दृष्यबाट पनि देख्न सकिन्थ्यो।
दुबैले के बताए भने, दुवै पार्टीका स्थानीय नेता–कार्यकर्ता अन्तरघुलित भइसकेकाले आन्तरिक समस्या बेहोर्नु परेको छैन। त्यसैले एमाले–माओवादी केन्द्रका स्थानीय नेता–कार्यकर्ताले पुरै ध्यान कांग्रेसका मतदाताहरुलाई आफ्नो पक्षमा पार्नेतिर केन्द्रित गर्न पाएका छन्। nepalkhabar
