इजिप्टमा दुईवटा रेल आपसमा ठोक्किदा ३६ जनाको मृत्यु भएको छ । उक्त दुर्घटनामा परि १ सय २३ जना घाइते भएका छन् ।
उत्तरी तटीय सहर एलेक्जान्ड्रियाको खोर्सिदमा दुईवटा रेल आपसमा ठोक्किएको हो । दुर्घटनालगत्तै उद्धारकर्मीहरु पुगेर उद्धार गरेका थिए।
दुर्घटना कसरी भयो भन्ने प्रष्ट भइरहेको छैन । इजिप्टका रेलमन्त्रीले दुर्घटनाको छानविन गर्न आदेश दिएका छन् ।
स्थानीय संचारमाध्यमले जनाएअनुसार बिग्रिएर रोकिएको रेलमा अर्को रेल आएर ठोक्किएको हो ।नोभेम्बर सन् २०१३ मा दक्षिण कायरोमा भएको दुर्घटनापछि यो नै सबैभन्दा ठूलो रेल दुर्घटना भएको जनाइएको छ ।
त्यतिबेला एउटा बस र रेल आपसमा ठोक्किदा २७ जनाको मृत्यु भएको थियो ।सन् २००२ मा भएको रेल दुर्घटनामा इजिप्टको इतिहास मै भयानक मानिन्छ । उक्त दुर्घटनामा ३ सय ७३ जनाको मृत्यु भएको थियो ।
