बेइजिङ । चीनको चेतावनीपछि भारतले चीनसँगको सीमा क्षेत्रबाट आफ्नो सेनालाई फिर्ता गरेको छ । डोकलाम क्षेत्रमा १८ जुनदेखि ठूलो संख्यामा दुवै देशका सेना आमने–सामने भएर बसेका थिए । चीनले आफ्नो क्षेत्रमा सडक निर्माण गरिरहेको अवस्थामा भारतीय सेना आएर अवरोध गर्न खोजेको बताएको थियो ।
चीन सरकारले सो क्षेत्रमा भारतले ठूलो संख्यामा सेनालाई फिर्ता लगेको बताएको छ । ४ सयको संख्यामा भारतीय सेना रहँदै आएको हाल ४० जनामात्र तैनाथ रहेको चीनले जनाएको हो । १५ पृष्ठ लामो दस्तावेज जारी गर्दै चिनियाँ विदेशमन्त्रालयले भनेको छ, ‘डोंग लाङ्ग’ (डोकलाम) क्षेत्रमा सुरुमा ४०० भारतीय सैनिक रहेकोमा हाल घटाएर ४० मा सीमित गरिएको छ ।
चीनले आफ्नो भूमि रक्षाका लागि जस्तोसूकै कदम उठाउन आफू तयार रहेको बताउँदै वार्ताका लागि भारतीय सेना फिर्ता हुनुपर्ने शर्त अघि सारेको थियो । दुई देशबीचको सम्बन्ध सुधार गर्ने हो भने भारतीय सेना फिर्ता हुनुपर्ने प्रष्ट पार्दै चीनले अन्यथा भारतले चाहेजसरी नै हर मोर्चाबाट जवाफ दिन आफू तयार रहेको प्रष्ट पारेको थियो ।
चिनियाँ दस्तावेजमा भनिएको छ, ‘१६ जुन २०१७मा चीनले डोंग लाङ्ग क्षेत्रमा सडक बनाइरहेको थियो । १८ जुनमा २७० भन्दा बढी भारतीय सैनिक हतियार र बुल्डोजरसहित सिक्किम सेक्टरबाट सीमा क्षेत्रमा आए । भारतीय सेना सडक बनाउने काममा अवरोध गर्न चिनियाँ क्षेत्रको १०० मिटरसम्म प्रवेश गरेका थिए । एक समय त्यहाँ भारतीय सैनिकको संख्या ४०० पुगेको थियो ।’
भारतले ६ सातादेखि सो क्षेत्रमा आफ्नो ३ सय ५० सैनिक तैनाथ रहँदै आएको दावी गरेको छ । देशको सार्वभौम सत्ता जोगाउनका लागि चिनियाँ सैनिकले आत्मसमर्पण नगर्ने चिनियाँ राष्ट्रपति सी जिङपिङले बताएका छन् ।
