गत आइतबार राति प्रसारण भएको ‘साझा सवाल’ कार्यक्रमपछि प्रधानमन्त्री शेरबहादुर देउवाको चर्चा अहिले चुलीमा छ । उक्त बहस कार्यक्रममा सहभागीहरुका प्रश्नप्रति जिम्मेवार नभएको भन्दे उनको आलोचनासँगै नकारात्मक टिप्पणी बढी भएका छन् ।
प्रधानमन्त्रीका रुपमा कार्यक्रममा जनताका सवाल जवाफ दिन प्रस्तुत भएका उनी जिम्मेवार नदेखिएको धेरैले आरोप लगाएका छन् । उनी प्रश्नकर्तासँग झर्किएको, उत्तरदायी नभएकालगायतका विभिन्न कारणले उनी अहिले धेरैको दृष्टिको खराब चरित्र निर्माण गरेका छन् ।
कार्यक्रमपछि मुलुकको प्रधानमन्त्रीको शैक्षिक योग्यता पनि चर्चामा छ । हाम्रो संविधानले मुलुकको प्रधानमन्त्री हुनका लागि शैक्षिक मापदण्ड तोकेको छैन् । तर पनि अहिले प्रधानमन्त्रीको शैक्षिक योग्यता कति हुनुपर्ने भन्ने विषयमा सामाजिक सञ्जालमा थुप्रै ‘ट्रोल’ भइरहेका छन् । जसमा बेलायतस्थित प्रसिद्ध अक्सफोर्ड विश्वविद्यालयको नाम चर्चामा छ ।
प्रश्नकर्ताको आशय थियो, विश्वका विकसित मुलुकहरु सिंगापुर, अमेरिका, चाइना र बेलायतका उत्कृष्ट विश्वविद्यालयमा अध्ययन गरेका व्यक्तिहरु प्रधानमन्त्री भएका छन् । बेलायतकै कुरा गर्दा विगत ७० वर्षयता सबै प्रधानमन्त्रीहरु अक्सफोर्ड विश्वविद्यालयमा अध्ययन गरेका छन् ।
तर बेलायतको ७० वर्षयताको इतिहास केलाउने हो भने सबै प्रधानमन्त्री अक्सफोर्डमा भने पढेका होइनन । सन् २००७ देखि २०१० सम्म प्रधानमन्त्री भएका गोर्डेन ब्राउन न त अक्सफोर्ड गए न त क्याम्ब्रिज विश्वविद्यालय नै पुगे । त्यस्तै, सन्. १९९० देखि १९९७ सम्म प्रधानमन्त्रीको पद सम्हालेका जोन मेजर पनि अक्सफोड, क्याम्ब्रिज जस्ता राम्रा विश्वविद्यालयमा पढेका थिएनन ।
कति छ त प्रधानमन्त्री शेरबहादुर देउवाको शैक्षिक योग्यता ?
देउवाले राजनीतिक शास्त्रमा स्नातकोत्तर गरेका छन् । त्यस्तै, कानुनमा स्नातक तह गरेका छन् । त्यस्तै उनी बेलायतको प्रतिष्ठित मानिएको विश्वविद्यालय ‘लन्डन स्कुल अफ इकोनोमिक्स’मा राजनीतिक शास्त्र अनुसन्धानका विद्यार्थी थिए ।
